37 Duanag an t-Seòladair 37


 
Séist
 Gu ma slàn do 'n rìbinn òig
Tha tàmh an eilean gorm an fheòir
'S e dh'fhàg m'inntinn trom fo leòn
Nach fhaod mi 'n còmhnuidh fuireach leat.
 
An àm dhuinn dealachadh Di-màirt,
Gun fhios an tachair sinn gu bràth,
Gu 'n dh'iarr mi gealladh air mo ghràdh,
'S a làmh gu 'm biodh i fuireach rium.
 
Sheall i orm gu h-iochdmhor, caoin
'S na deòir a' ruith bho 'sùilean maoth
Gu'n chuir e saighead gheur 'nam thaobh
An gaol a thug mo chruinneag dhomh.
 
Tha 'n fhairge 'g éirigh suas 'n a smùid,
Is mise 'n ceangal aig an stiùir,
Ach chuir e spionnadh ùr 'nam dhùirn,
An rùg a thug mo chruinneag dhomh.
 
Shiùbhlainn deas is shiùbhlainn tuath,
Dh'fhuilinginn acras agus fuachd
'S cha ghearaininn air smùid a' chuain,
Na 'm buannaichinn a' chruinneag ud.
 
Thug i dealbh dhomh air an tràigh
Is dualan mìn de chuailean bàn
Tha sin a' cur 'n am chuimhne ghnàth
An gràdh a thug mo chruinneag dhomh.
 
'N uair bhios ise trom 'n a suain
Bidh mis' air bhàrr nan crannag shuas
A' pasgadh sheòl, 's a'seinn mo dhuain
Mu'n luaidh a thug mo chruinneag dhomh.
 
'S tric mi cuimhneachadh le spéis
'N uair bha sinn ann an gleann nan geug
A h-uile gòraiche gun chéill'
A rùn mi-fhéin 's mo chruinneag ann.
 
'S ged tha mi 'n seo air bhàrr na sìon
A' sabaid ris a' Chuan-an-iar
Cha bhi mi cuimhneachadh mo dhìol
'N uair ni Catrìona furan rium.
 
Ach thusa, ghaoth, tha dol gu tuath
Thoir leat mo shoraidh seo gu m' luaidh
Is innis dhi, ma bhios mi buan
Nach caill i' duais ri fuireach rium.

=============
Return

Courtesy of An Cliath Clis
www.ancliathclis.ca